আগন্তুক নৱবৰ্ষৰ প্ৰাকমুহূৰ্তত কঠোৰ প্ৰশাসন, কিন্তু কিয় ?

আগন্তুক নৱবৰ্ষৰ প্ৰাকমুহূৰ্তত কঠোৰ প্ৰশাসন, কিন্তু কিয় ? 

অসমৰ মুখ্যমন্ত্ৰী হিমন্ত বিশ্ব শৰ্মাই আৰক্ষী অধীক্ষক (এছপি), উপায়ুক্ত (ডিচি) আৰু জিলা পৰিবহণ বিষয়াসকলক আগন্তুক নৱবৰ্ষৰ সময়ত সুৰাপান আৰু গাড়ী চলোৱাৰ বিষয়ত কঠোৰ সতৰ্কতা অৱলম্বন কৰিবলৈ নিৰ্দেশ দিছে। মুখ্যমন্ত্ৰীয়ে ২০২১ চনৰ ৩১ ডিচেম্বৰ আৰু ২০২২ চনৰ ১ জানুৱাৰীত নৱবৰ্ষৰ প্ৰাকমুহূৰ্তত অসমৰ সকলো জিলাৰ আবকাৰী অধীক্ষকসকলক সুৰা আৰু ড্ৰাইভ বিষয়ত চকু ৰাখিবলৈ নিৰ্দেশ দিয়ে।

মুখ্যমন্ত্ৰীয়ে ভিডিঅ' কনফাৰেন্সৰ জৰিয়তে উপায়ুক্ত আৰু অন্যান্য উচ্চ পদস্থ বিষয়াসকলৰ সৈতে সম্পৰ্ক স্থাপন কৰে আৰু সুৰাপান আৰু গাড়ী চলোৱাৰ ঘটনা প্ৰতিহত কৰাৰ পৰিপ্ৰেক্ষিতত আগন্তুক নৱবৰ্ষ উদযাপনৰ সময়ত ৰাস্তাত প্ৰয়োজনীয় নিষেধাজ্ঞা আৰোপ কৰিবলৈ নিৰ্দেশ দিয়ে। তেওঁ লগতে উপায়ুক্ত সকলক ৰাজ্যখনৰ চিকিৎসা মহাবিদ্যালয়, চিকিৎসালয় আৰু অন্যান্য জিলা অসামৰিক চিকিৎসালয় সমূহ, বিশেষকৈ ৩১ ডিচেম্বৰৰ নিশা পৰিদৰ্শন কৰাৰ দায়িত্ব ল'বলৈ নিৰ্দেশ দিয়ে। তেওঁ পথ দুৰ্ঘটনাত পীড়িতসকলৰ দ্ৰুত চিকিৎসা হস্তক্ষেপৰ লগতে চিকিৎসালয়সমূহত চিকিৎসকৰ উপলব্ধতাৰ বিষয়ে নিশ্চিত কৰিবলৈ কয়।

ইফালে, স্বাস্থ্য সেৱাৰ যুটীয়া সঞ্চালক সকলকো চৰকাৰে জৰুৰী কালীন পৰিস্থিতিত পলম নহ'বলৈ এম্বুলেন্সসমূহ সাজু কৰিবলৈ পৰামৰ্শ দিছে। মুখ্যমন্ত্ৰীয়ে উৎসৱৰ বতৰত সুৰাপান কৰি গাড়ী চলোৱা পৰিহাৰ কৰিবলৈ  মটৰ চালক সকলক আহ্বান জনাই। তেওঁ কয় যে মানুহে নৱবৰ্ষ উদযাপন উপভোগ কৰিব লাগিব কিন্তু তেওঁলোকে উপভোগৰ সীমা অতিক্ৰম কৰি নিজৰ জীৱন বিপদত পেলাব নালাগে কিয়নো জীৱন আন যিকোনো বস্তুতকৈ মূল্যৱান। প্ৰতিটো মানৱ জীৱন গুৰুত্বপূৰ্ণ আৰু নৱবৰ্ষ উপভোগ কৰাৰ বাবে মানুহৰ জীৱন হেৰুৱাব নালাগে বুলি মুখ্যমন্ত্ৰীয়ে কয়।